¡Asturies Esconsona colos mineros de la marcha!

Pronunciar la pallabra mineros, güei, ye facer un viaxe emocional a la situación que viven los mineros de L.laciana y d’El Bierzu. Mineros que tres dexar los güeyos, los riñones, el llombu y los pulmones no fondero’l furacu la mina, reciben l’agradecimientu de ser despoxáos de la so dignidá, el so sueldu y el so sustentu por desmesuráu que pudiere ser respeutu al trabayu que realicen.
Too esto entama, pola mala xestión de la patronal de les mines y los sos alcuerdos col gobiernu, esto provoca l’atrasu nel pagu de polo menos dos centenares de sueldos. Al menos los dos centenares citaos queden sin un mínimu pa ponei a les sos families un platu na mesa.
Como rempuesta a esta situación insostenible, esti grupu de trabayadores, con un valor impresionante, pretenden entamar lo que podría nomase la "Segunda Marcha Negra" emulando lo asocedío en 1992, asemeyandose dambos fechos. Entamará güei martes, 21 de setiembre, dende la capital del Valle de L.laciana.
Si too saliera tal cual ta plantegáu, llegaríen a Ponferrada'l xueves 23, onde esperalos una multitú de xente que sofita esta causa, y tendrá llugar una manifestación esperemos de gran estensión.
Pero la xornada continua, dende Ponferrada dirán a Llión, llegando ellí'l miércoles 29 de setiembre. Siendo coincidente esta fecha col día impuestu pala fuelga xeneral a nivel estatal y non solo esto, sinon que tien de cellebrase esi día una reunión en Bruseles, na que se decide si s'apreba o refuga'l Decretu que permitirá inyectar dineru pa la producción de carbón del Estáu y qu'esti carbón seya quemáu nes térmiques pa producir electricidá.
Dempués de toos estos duros díes, tienen pernidio que si nun se llega a un alcuerdu el 29 de setiembre, continuarán la marcha fasta Madrí.
Poro, dende Asturies esconsona, queremos ufrir tol nuesu apoyu a estos trabayadores de un valor incalculable, tol nuesu sofitu, y toles nueses fuercies pa emburriar caún de los músculos que se ponen en marcha non solo dende güei, sinón dende hai una llarga temporada.

Artículu "Democracia p'Asturies: Una iniciativa pa toxs y por toxs"

 Por Xosé A. Gonzalez

Muncho se vien falándo estes selmanes de lo asocedío alredor l'ochu setiembre. La xente, nel so llibre drechu d'opinar cunta que si una convocatoria yera meyor qu'otra, que yeren de calter estremáu, que l'asistencia foi meyor o peor y delles impresiones más. Diéronse valoraciones y comparances de toa triba, siempres inevitables y lóxiques nel clima d'alderique y reflexón que se vién viviendo dientru'l nacionalismu d'izquierda. Lo ciertu ye qu'esti ochu de setiembre hebo ciertu ambiente de construir, de dar pasos alantre, y poca xente faló d'estancamientu, prestaren o non les convocatories.

Fuera d'ello, con unes selmanes pasaes d'esa data, siempres sinificativa pa los qu'andamos nesti mundín tan pequeñu qu'a vegaes creemos grande, lo ciertu ye que l'alderique sigue siendo'l mesmu, el de la pernomada xuntaza. Xuntanza razonatible, necesaria y que ye normal que tea xenerando tanta espectación. Son los partíos los que tienen que facer d'esi alderique dalgo granible, y tienen que tomar les sos soberanes decisiones dientru los sos muérganos de decisión, eso si, siempres valorando lo que diz l'asturianu esmolecíu pola situación del país. Pero fuera d'esta dinámica, que'l tiempu dirá si positiva o negativa'l soberanismu asturianu tien de medrar dende los sos pegoyos, ello ye, enanchando cadarmes abiertes, ciudadanes y de vindicación nacional y social, empobinaes a construir texíu social.

Una d'eses cadarmes de les que falo, qu'apaeció nel mes de xunetu d'esti mesmu añu ye la iniciativa " Democracia p'Asturies/Democracy for Asturies". Una iniciativa qu'entamó desenrrollando la so actividá pa denunciar la situación predemocrática que carez el nuesu pueblu nel tarrén internacional, pero qu'evolucionó y se vió con fuercies pa facelu tamién nel planu nacional. Como tol mundiu sabe, esti pasáu 8 setiembre la plataforma ciudadana convocó una manifestación n'Uviéu de claro calter soberanista y qu'axuntó a bien de persones, saliendo alantre con bona sensación pa los ellí presentes. Bona sensación sabiendo valorar les llimitaciones de la izquierda nacional asturiana, y teniendo en cuenta que la convocatoria fízola una nueva plataforma xunitaria, que tien pocu andáu pel momentu.

Les persones qu'empobinamos esta plataforma nun queremos dexala morrer, queremos facer d'ella una ferramienta aglutinadora, abierta y xunitaria. Una ferramienta que xenere ilusión y espectatives, que trate de dar una rempuesta alternativa, de ciudadanos y ciudadanes esmolecios por algamar una Asturies que camine haza un procesu de democratización. Pero falamos d'una democracia de verdá, nunca sometía a los porgüeyos del Estáu Español, al que conocemos perbien y nun fai otru papel que'l de ser la nuesa ruina. Poro, si falamos d'un procesu de democratización nun vamos a ser hipócrites y dexar esto nuna actividá de 8 meses, 16 o 24. Si falamos de democratizar esti Pueblu y queremos camudar les coses debemos ser conscientes que'l camín ye perllargu y dificil. Y pa ello debemos tirar alantre con esta iniciativa, axuntando fuercies y deprendiendo de los erros, como non.

Asina, faigo un llamáu a toles persones que tean una sensibilidá social y nacional no que cinca a la pallabra Asturies, dende la humildá, a facer d'esta plataforma dalgo braeramente abiertu, plural y de fondu calter ciudadanu. A participar n'ella como asturianosy asturianes que somos, a aldericar nos conceyos abiertos, a organizalos espontaneamente ensín esperar a que naide los convoque y a facer país dende l'espaciu que representa " Democracia p'Asturies". A facer actividaes, desenrrollar nueves idees y facenos fuertes dende'l llema que da-y nome a esta iniciativa, pues ye cuestión de toos y toes qu'esto lleve a bon puertu. Repito, ye una opinión humilde y personal, pero pue ser una bona oportunidá p'axuntar a xente d'estremaes organizaciones, o xente ensín militancia dala y facer un bloque soberanista ciudadanu. Un bloque que respete la soberanía y diversidá de les organizaciones polítiques asturianes, pero que tamién tea'l sofitu de les mesmes, sobremanera de les qu'entá nun sofitaren publicamente la iniciativa.

Espero qu'esti artículu nun fuera mui repetitivu y aburríu pal llector, lo que nun m'estrañaría un res, pero solo quiero espeyar la necesidá de nun dexar morrer una iniciativa d'esti calter, que pue valir pa crear dinámiques xunitaries, perenriba sigles. Dinámiques qu'afonden na bas social, en crear concenxa soberanista nes cais, y consolidar un texíu cívicu coles idees clares. Y faigo una última reflexón, y ye qu'un movimientu de reconstrución nacional nun pue sofitase solo en términos eleutorales, pues estes dinámiques eleutorales tienen que tener el sofitu detrás d'un pueblu vivu, lluchador y consciente de la so realidá. Esa dinámica aglutinadora prestariame enforma que fuera representada por " Democracia p'Asturies". Por que ye un llema asumible, ye una iniciativa abierta y sobretoo porque yá esiste. Contruyamos l'alternativa ciudadana.

Movilización alternativa a CC.OO Y UXT por parte de la CSI (29 setiembre)

La Corriente Sindical d’Izquierda vien de llamar a la participación na fuelga xeneral del 29 de setiembre. Con crítiques al Gobiernu, a la Patronal y a UXT y CC.OO, la Corriente convoca una manifestación alternativa en Xixón.
Dende la CSI vienen de denunciar la situación económica y social que se ta viviendo n’Asturies y nel Estáu español. El sindicatu asturianu señala que la patronal y la banca “pretenden siguir consiguiendo los mesmos beneficios a costa del dineru públicu y del bolsu de los trabayadores”, mentantu que’l Gobiernu “impón una reforma llaboral qu’abarata y facilita’l despidu”
La conxelación y baxa de los salarios, la reducción de les pensiones, l’aumentu de la edá de xubilación a los 67 años, les condiciones llaborales y los recortes n’inversiones sociales y en sanidá, educación y servicios públicos; fueron otres de les crítiques de la Corriente Sindical d’Izquierda.
Al mesmu tiempu, la CSI critica’l llabor d’UXT y CC.OO a los que califica de “dinosaurios burocratizaos” y de tar “financiaos y sosteníos polos distintos gobiernos”. Por mor de les discrepancies colos sindicatos mayoritarios, la Corriente convoca una manifestación alternativa pal 29 en Xixón, con salida a les 13.00 de la Plaza l’Humedal.

Fonte: asturies.com

Espicha escontra la represión.

Asturies Esconsona quier espublizar nel so espaciu la información que recibió por parte de Sofitu ya que sofita plenamente l'actu que se va llevar a cabu: Una espicha escontra la represión.

Esti Sabadu 18, en plenes fiestes de San Mateo n'Uviéu, en Muerganu Antirrepresivu Popular Sofitu entama un nuevu actu col envís de siguir recaldando perres pa facer frente a la represión politico-policial que sufren los y les militantes de la izquierda soberanista d'esti país. Con ello, nos ultimos meses podemos cuntar:
-Detención por "atentáu a la autoridá" d'una moza acusada d'agredir a Tini Areces. La so madre tamién ye denunciada.
-Xuiciu escontra un policía español por agresión a un mozu independentista.
-Multes a solidarios por acudir a la carcele de Villabona a un actu solidariu colos presos politicos
-Xuiciu escontra un policía nazional español por amenaces y agresión a un mozu militante de Darréu
-Multa a una moza independentista por cantar "muncha policía, poca diversión" en Xixón.
-Multa a un mozu por portar la AS na matricula del so coche por contra de la impuesta E
-Acusación a un mozu de "ciberterrorismu"
- Detención illegal d’una independentista nun actu d’UPyD
Dende Sofitu camentamos que sólo la solidaridá de puede detener esta escalada represiva y que ye importante la implicación de toos/es. Con estos actos festivos recaldamos perres pal pagu de multes y abogaos y pa la ellaboración de campañes antirrepresives.
Sabadu 18, L'Arcu la Vieya (Cai Postigu), 20:00 hores
Por 8 euros podras degustar una amplia variedá de tapes y platos.

ENCAMENTAMOS APUNTASE ENANTES DEL VIENRES 17 NEL MAIL: sofitu@nodo50.org
LA REPRESIÓN YE UN FECHU, LA RESISTENCIA UN DERECHU
PUXA ASTURIES LLIBRE

I Sones de Revolución

Con motivu de la elleición del grupu asturianu que zarrará'l cartelu del IX festival "Asturies nun escaez", La organización de mocedá Darréu va organizar un concursu col nomatu "Sones de Revolución" col númberu primeru lo que dexa entender que non solu va cellebrase esti añu, un grupu asturianu podrá tocar con otros grupos estupendos tantu de dientru'l país comu del Estáu .Esti concursu tendrá llugar el 2 d'Ochobre nel llocal de Uviéu "I-POP"  a les 19:00H nel que podrán participar los grupos asturianos que ciñanse a unes sencilles bases que sedrán espublizaes nos prósimos díes.  
Desta mena, Darréu anuncia la cellebración del Día de la Mocedá Revolucionario 2010 los prósimos 2, 15 y 16 d'ochobre, xornada de conmemoración de la Revolución Asturiana de 1934 y de vindicación de la mocedá revolucionario qu'esta edición va volver cellebrase en Xixón onde se ficiere en 2009 tres la expulsión "de facto" del Conceyu de Llangréu.

+info: www.darreu.org

Cientos de persones fain del 8 setiembre un día de llucha y reivindicación

Les dos ciudaes más importantes del país, Uviéu y Xixón, vivieron actos xunitarios onde se pidió democracia y futuru p'Asturies.

Dos actos xunitarios aconceyaron güei a cientos de persones nes cais asturianes pa facer d'esti 8 setiembre un día de llucha y reivindicación polos derechos del pueblu asturianu y pol futuru d'Asturies. En Xixón, la "Plataforma Unitaria 8 Setiembre" convocó una concentración a les 12:30 hores na Plaza del Nautico. N'Uviéu, la plataforma ciudadana "Democracia p'Asturies" convocó'l manifestamientu del Día de la Nación Asturiana.

Los dos actos xunitarios axuntaron bien de xente nes dos ciudaes más importantes del país reivindicando y refugando los actos institucionales del "Principado".

El primer actu del día foi'l convocáu col llema "Pol futuru d'Asturies" en Xixón, que sofitaron los partíos Bloque por Asturies, UNA y Andecha Astur, les formaciones llocales d'UICA, Asturianistes por Nava, Más Corvera y S.XXI de Muros del Nalón, los sindicatos CSI y SUATEA y los coleutivos Fai! y Entemecer. L'actu entamó con retrasu cerca de la 1 de la tarde con una pieza del gaiteru Llorián García y la presentación del actu a cargu del actor Toño Caamaño, delles intervenciones y l'actuación de Mari Luz Cristobal Caunedo dieron pasu a la llectura del manifiestu consensuáu y el pieslle del actu.
N'Uviéu, a la una y media, entamaba'l manifestamientu del Día de la Nación Asturiana col llema "Democracia p'Asturies" que percorrió les cais de la capital asturiana, dende la Estación del Norte hasta delantre de Presidencia del "Principado" y que sofitó'l partíu Andecha Astur, el sindicatu Corriente Sindical d'Izquierda y la organización xuvenil independentista "Darréu". Al final de la marcha, una vocera de la plataforma ciudadana "Democracia p'Asturies" presentó l'actu políticu dando pasu a les intervenciones de voceros de les organizaciones presentes.

Fonte: http://www.infoasturies.net/

CONCIERTU 8 SETIEMBRE

 Ente los días martes 7, y miércoles 8 repartense nel chigre La Bodega2 en Villaviciosa una serie de conciertos pa "festexar" el día d'Asturies (8 Setiembre) con grupos de verdá asturianos.
D'esta mena, mañana, martes 7 de setiembre a partir de les 22:00hores tocarán los grupos: P'AMUSQUIS, LA TARRANCHA y VINAGRE DE SIDRA.
Dexando pal miércoles, día 8, la actuación del grupu ODIO VISCERAL, de 21:30 a 00:00hores.
Asina tolos asturianos que quieran pasase per elli, y cellebrar un 8 setiembre cercanu a grupos asturianos, tan convidaos a disfrutar de bona música.

El chigre ú llevase a cabu, tien la siguiente direición: Cervecería La Bodega2; Plaza El Güevu Nº:28 (Ribeseya)

 

PAS y URAS en Candás

Esti 8 de setiembre Unión Asturianista, van celebrar un actu políticu en CANDÁS y una comida de xermandía.
L’actu políticu va celebrase nel «Monumentu a la mina y a la mar», na Escalera de La Gabiana (escalera que va dende l’Ayuntamientu al puertu), en Candás, a les 13:30 horas. Dempués va haber una xinta de xermandía a partir de les 14:30 de la tarde nel Restaurante La Fonte, Avda. del Ferrocarril 4 y 8 (antigua Avda. Fernández Ladreda).
Tamién despliquen públicamente el ¿por qué non? acuden al actu impulsáu pol BA en Xixón:

Estimaos:

El PAS recibió nel so día una invitación vuestra pa una manifestación unitaria pal 8 de septiembre de 2010. Anque con reserves por delles razones, en principiu paeciónos bien, porque, como siempre pensamos, esti país necesita normalizase en munchos aspectos, ente otros, los relativos al 8 de septiembre, que debería tender a ser unitariu y políticu, como notres nacionalidaes. Per otru llau, tamos interesaos, tamién como davezu, en mantener les meyores relaciones polítiques con toles fuerces asturianes, especialmente, les del ámbitu asturianista.

Ensin embargu, nun podemos aceptar el planteamientu final pal 8 de septiembre. De mano, porque una manifestación (que tien les sos fórmules y los sos ritos) camuda n'otra cosa. En segundu llugar, porque la iniciativa dexa de tar nes manes de fuerces polítiques pa convertise nun mangaráu d'organizaciones y colectivos, toos, ensin dulda, respetables, pero que nun encaxen, al nuestru talantar, nun marcu esclusivamente políticu, como debe ser el del 8 septiembre.

Esa modificación, polo tanto, del formatu, de los asistentes, y la impresión final que, al nuestru talantar, se treslladaría a la opinión pública de "totum revolutum" y d'actu más asemeyáu a un Primeru de Mayu qu'a otra cosa, fai que tengamos que negar la nuestra presencia con vosotros pa esa fecha. Pa la vuestra información, vamos caltener, pol contrariu, la otra parte los actos que teníamos previstos pa esa fecha, los que faremos con la URAS, colos que tenemos, como se sabe, firmáu un pactu hai tiempu.

Deseámosvos, como a tolos asturianos, un feliz día de la nación.

Valledor presente en Xixón el 8 setiembre

Segun recueye l'últimu númberu del selmanariu Les Noticies, Francisco Javier García Valledor, militante destacáu d'IU y ex Conseyeru de Xusticia y Interior va tar presente na concentración de Xixón. Valledor camienta que "esti añu ye la primer vez dientro del asturianismu qu'hai una voluntá de xuntura, tanto de partíos como de persones independientes, dalgo que va ser perimportante pa esti Día d'Asturies" y fala de la necesidá de llograr un proyeutu "lo más ampliu, diversu y plural posible".
Valledor, postuláu por dellos medios como candidatu d'una hipotética candidatura conxunta asturianista proyeutu, afirma que ye perimportante que les fuercies polítiques entamen a falar p'algamar una candidatura xunitaria pal 2011. "Dientro de les cuestiones de les que tendrán que falar ta la de quién ye'l candidatu, pero a min paezme que nesti momentu soi absolutamente secundariu", declara a Les Noticies l'ex-parllamentariu na Xunta Xeneral, hasta la so dimisión por discrepancies.
Señala Valledor que "tovía" milita n'IU onde  hai "muncha xente ta farto de la dirección y de la estratexa política, onde dalgunos se tan agarrando al poder" que en dalgún momentu tendrán que dicidir que facer, "nun se si será enantes o dempués de les elecciones, pero hai xente que tien posibilidaes de formar parte d'un proyeutu políticu nuevu n'Asturies" desplica.

Fai! amestase a la convocatoria de la " Plataforma Unitaria 8-S"

Fai! espublizó la siguiente noticia: 
La organización d'esquierda soberanista quier asoleyar públicamente'l so sofitu a la convocatoria entamada pola "Plataforma Unitaria 8S" como día de rempuesta al cuadonguismu españolista impuestu, a la negación de los derechos coleutivos del pueblu asturianu y al retrocesu social y esfarrape medioambiental que siguimos careciendo metanes de la crisis capitalista.

Comunicáu de prensa completu:

Énte la llegada d'otru 8S y les dinámiques que nelli se xeneren l'Asamblea Xeneral de Fai! quier espresar lo viniente:

1) Fai! valora positivamente la constitución d'una plataforma plural y abierta a los coleutivos dende la que coordinar unos actos de rempuesta a la situación predemocrática que carez el pueblu asturianu, espeyada nunos festexos patronales -que non nacionales- españolizantes que faen escarniu de la nuesa identidá.

2) Fai!, qu'históricamente vien calteniendo una postura d'oposición a la consideranza del 8 de setiembre como presuntu "día nacional asturianu", atopando esta data como'l día de "La Santina" y nel que la identidá asturiana nin ye homenaxeada nin cellebrada, sí entiende que la festividá institucional ufre un marcu afayadizu pa salir a les cais y refugar dende elles la situación nefasta nel tarrén nacional, socioeconómicu y ambiental na que s'atopa esta nación milenaria. Si, amás, la convocatoria nun afonda nel 8S como día nacional y el marcu ye d'entendimientu ente les estremaes organizaciones de la esquierda soberanista asturiana la cita fáise obligatoria, como manera de zarrar files énte la sociedá dientro d'esti espaciu ideolóxicu.

3) Fai!, al tiempu, quier facer un llamáu a les organizaciones de la esquierda soberanista a entamar y participar n'espacios como'l de la "Plataforma Unitaria 8S" que tean empobinaos a les cellebraciones conxuntes y unitaries del 25 de mayu de 2011 como día nacional asturianu, una data que representa la soberanía popular asturiana y onde se fai cellebración de la creación de la bandera d'Asturies y del Exércitu Defensivu Asturianu, qu'amás foi reivindicada históricamente pol soberanismu asturianu nos años 70.

I XUNTANZA DE MÚSICOS ASTURES

Los días 10 y 11 de setiembre nel prau de Tereñes, onde ta habilitada una zona d'acampada, repartense un gran númberu de actuaciones musicales, estes sí, asturianes y con raigañu.
El vienres, día 10, a partir de les cinco de la tardi, toquen los grupos
-TXM
-ENTROPIA
-MALVASEDA
-MINORÍA AGRESIVA
-KURSK
-RED LINE
-KUARENTENA
-GOMERU
Y el domingu, día 11, a partir de les cuatru la tardi:
- CRITICAL
-UNO MAS UNO
-GRISU
-G-RIDDAZ+13 PALABRAS
-K T GRAPO
-ZURDHA
-ANYWHERE
-MEZA
-VINAGRE DE SIDRA
-OFFICER DOWN
Emtama la asociacion xuvenil ENTAINA.

8 Setiembre.

Los promotores de la iniciativa ciudadana “Democracy for Asturies / Democracia p’Asturies” quieren facer, al traviés d’esti comunicáu, un llamamientu públicu a la sociedá asturiana, en xeneral, y a los militantes y simpatizantes de la izquierda nacionaliega, en particular, a participar nel manifestamientu xunitariu que convocamos, precisamente baxo’l lema “Democracia p’Asturies”, pal prósimu 8 de setiembre.
Camienten que pa esa fecha tan señalada, el Día de la Nación Asturiana, ye imprescindible la convocatoria d’esta movilización, col enfotu de facer del mesmu un díi de reivindicación nacional y social y de denunciar la situación pre-democrática que carez Asturies. El manifestamientu ta convocáu pa les 13’00 hores con salía de la Estación del Norte (Uviéu) y yá cunta con varios sofitos.
“ Democracia p’Asturies” ye una iniciativa ciudadana que ñació nel mes de xunetu del presente añu, que ta promovía por militantes de la izquierda nacionaliega asturiana y encadarmada alrodiu del “Manifiestu pola consecución d’una democracia plena p’Asturies: Democracia p’Asturies”, col que se quieren algamar dos oxetivos: per un llau, axuntar les estremaes sensibilidaes de la izquierda nacionaliega asturiana y, per otru, dar a conocer fuera de les nueses llendes la yá citada situación pre-democrática que carez el nuesu país. Anguañu, la iniciativa cunta col sofitu de más de 35 organizaciones polítiques, sindicales, sociales y culturales y cientos d’adhesiones individuales de toa Europa.