La Oficialización de les seleiciones deportives asturianes y la so normalización

Les organizaciones polítiques Darréu y Fai! pretenden amosar el so descontentu a causa de l'ausencia, un añu más, del partíu de navidá que debiera xugar la Seleición Asturiana de Fúbol. Ya van 8 años dende aquel últimu partíu n'Avilés ensín ver al conxuntu nacional. Recordar que tanto nel añu 2000, nel Estadiu Carlos Tartiere, como nel siguiente, nel Estadiu d'El Molinón, l'eventu vendió cuasi toles entraes, enllenandose dambos campos, los cualos gocien d'un aforu pergrande. L'últimu, nel Estadiu Suárez Puerta d'Avilés, tamién foi un ésitu en cuantu a asistencia d'hinches asturianos se refier.
Paez-yos qu'entamar de nuevu un partíu amistosu con otra seleición nacional sedría un ésitu sinificatible. La ciudadanía asturiana tien ganes de ver xugar a la seleición del so País y económicamente sedría un ésitu que podía ayudar al fúbol asturianu, sobremanera a les categories de mozos y moces, qu'anguañu viven munches dificultaes. Nun debemos escaecer que la crisis capitalista tamién pasa factura a los clubes deportivos más modestos.
Asina señalen al Gobiernu del Principáu d'Asturies y a la Real Federación Asturiana de Fúbol como responsables d'esti murniu panorama pal fúbol asturianu y los sos seguidores. La ñegativa constante de nun dexar xugar al equipu asturianu nun ye por más razones que marxinar cualesquier síntoma del fechu nacional asturianu y, asina de pasu, finar cola nuesa hestoria ya identidá. Tienen noxu a tolo que güela a asturianu.

Énte esti despreciu al nuesu deporte, dende les sos organizaciones a les que xúnese Asturiesesconsona sofiten la oficialización de les seleiciones deportives asturianes y la so normalización, con unes federaciones que seyan consecuentes cola defensa de los intereses del deporte del País y que nun tean en manes del Réxime españolista del PSOE-IU-PP. (Darréu y FAI!, 2010)
¡ Una nación, una seleición !
¡ Oficilidá de les seleiciones deportives asturianes !